About Us
Amdanom Ni

Henffych, a Chroeso!

Lleolir Cwfen yr Axis Mundi yn ne-ddwyrain Cymru ac yn ymarfer Wica Draddodiadol Prydain – math benodol, ynydol o Wrachyddiaeth Draddodiadol Prydain.

           Mae Wica Draddodiadol Prydain yn olrhain ei gwreiddiau i ardal y New Forest yn Lloegr yn y 1940au cynnar, gyda Gerald Gardner yn sylfaenydd Wica gyfoes. Datblygodd Gardner, ynghyd â’i Gwfen Bricket Wood, y dysgeidiaethau a gafodd ymhellach oddi wrth Cwfen y New Forest.

           Mae ein cwfen ni yn dilyn Traddodiad Alecsandraidd o Wrachyddiaeth, a gafodd ei sefydlu yn y 1960au gan Alexander Sanders a’i wraig, Maxine Sanders. Gan gynnwys hud seremonïol a Qabalah—meysydd roedd Alexander Sanders wedi’u hastudio’n annibynnol—daeth y Traddodiad Alecsandraidd yn draddodiad ynddo hi ei hun, eto’n dal i fod yn agos at Wica Gadneraidd.

           Mae llinach glir gan ein cwfen ni, ac rydyn ni’n olrhain ein llinach yn ôl i Alexander Sanders, trwyddo fe yn ôl i Gerald Gardner, ac yn ei thro yn ôl i Gwfen y New Forest. Mae’r Traddodiadau Alecsandraidd a Gardneraidd ill dau yn ffurfio craidd o’r hyn a elwir y Wicâu.

           Fel Cwfen sy’n ymarfer Wica Draddodiadol Prydain, traddodiad cyfrin ydyn ni, sy’n rhwymedig trwy lw, gyda dysgeidiaethau yn cael eu trosglwyddo’n gyfrinachol i’r rhai sydd wedi’u hynydu i’r Cylch Mewnol a’r Traddodiad. Dyw’r hyn rydyn ni’n ei gwneud ddim ar gael ar Google, a dydych chi ddim yn gallu ei dilyn ar Facebook, na’i phinio ar Pinterest, na’i charu ar Instagram, na’i hail-bostio ar Twitter, na’i chymysgu ar TikTok, nac ar gael i’w darllen mewn llyfr—mae’n rhaid ei byw a’i phrofi. I’r rhai sy’n cael eu galw i’r Llwybr, mae cael eich ynydu i Gwfen yr Axis Mundi yn dechrau gyda’n Hyfforddiant yn y Cylch Allanol, sy’n ofyniad bron bob tro. Ewch i’n tudalen “Training/Hyfforddiant” am ragor o wybodaeth.

           Mae ein harferion yn draddodiadol Alecsandraidd ac yn cynnwys:

·   Gweithio yn awyrwisg (noethni defodol)

·   System tair gradd o ynydu

·   Dathlu’r Sabatau a’r Esbatau

·   Creu a gweithio hud a gwrachyddiaeth

Rydyn ni’n ymarfer dewiniaeth a hud fel dulliau o hunan-ddatblygiad sy’n rhoi’r grym yn ôl ichi. Mae pob person sy’n cael ei ynydu yn wrach ac yn offeiriad neu’n offeiriades ill ddau ar Dduwiau’r Wicâu. Mae gan y Cylch Mewnol – craidd gweithiol y gwfen – dros ugain mlynedd o brofiad ynydol. Mae pob gradd yn dwysáu cysylltiad â’r Duwiau a’r Dirgelion drwy hyfforddiant strwythuredig a phrofiad uniongyrchol.

Rydyn ni’n rhan o Draddodiad Cyfrin: nid yw Duwiau’r Wicâu yn ffigyrau a geir mewn llyfrau neu ar-lein – maen nhw’n cael eu profi, yn bersonol ac yn ddwfn, trwy brofiad a Gwaith. Nid oes modd dysgu’r Dirgelion mewn geiriau yn unig; rhaid eu teimlo, eu hadnabod, eu byw, a’u profi.

Rydyn ni’n cwrdd unwaith i ddwywaith y mis i ddathlu’r Esbatau (defodau lleuad) a’r Sabatau (gwyliau tymhorol)—sef o leiaf 21 o gyfarfodydd y flwyddyn, yn ogystal â Gweithiau ychwanegol a digwyddiadau cymdeithasol achlysurol. Disgyblaeth, ymroddiad, diwydrwydd, ac ymrwymiad yw cerrig sylfaen ein gwaith gyda’n gilydd.

Mae ein cwfen yn anrhydeddu’r hen dduwiau. Rydyn ni’n eu haddoli, eu dwysbarchu, ac yn eu cofio. Rydyn ni’n galw ar Eu henwau—ac maen Nhw’n ateb. Mae’r Traddodiad yn adnabod y deinameg rhwng y duw a’r dduwies, y gwrywaidd a'r benywaidd, ond maen ein dealltwriaeth o’r duwiau yn derbyn y sbectrwm llawn o rywedd a hunaniaeth. Rydyn ni’n croesawu pawb sydd wir yn ceisio, waeth beth fo eu rhyw, eu rhywioldeb, hunaniaeth rhywedd, oedran, gallu corfforol, neu gefndir cymdeithasol.

Rydyn ni’n annog gwaith ymarferol gyda’r gwfen ac ymarfer unigol hefyd—gan gynnwys hunan-astudio a gwaith a dderbynnir. Am ragor o wybodaeth, ymwelwch â’n Cwestiynau Cyffredin.

Fel llawer o gwfenni Wica Draddodiadol Prydain, rydyn ni’n byw yn ôl y rheolau “Mae popeth yn Wica yn cael ei ofyn amdano,” a “Dylai fod yn anodd dod i mewn iddo, ac yn hawdd mynd allan ohono.” Dyw’r llwybr yma ddim yn un hawdd. Mae’n galw am ddyfalbarhad, gwaith caled, ac ymroddiad dwfn—ac mae’r gwobrau’n ddwys ac yn gallu newid eich bywyd.

Wedi’i sefydlu yn 2023, mae Cwfen yr Axis Mundi yn cario’r Traddodiad byw ymlaen, dan arweiniad aelodaeth sydd â dros bedair blynedd ar hugain o brofiad ynydol gyda’n gilydd.

Os bydd hyn yn siarad â’ch calon, rydyn ni’n eich gwahodd i gysylltu trwy e-bost ar waelod y dudalen. Mae’r llwybr yn disgwyl amdanoch chi.