Outer Court Training
Hyfforddiant Cylch Allanol

Ar hyn o bryd (Mawrth 2025), nid ydym yn derbyn myfyrwyr nes Heuldro'r Gaeaef 2025. Dewch yn ôl yn aml am ddiweddariadau.

Mae Cwfen yr Axis Mundi yn cynnig Rhaglen Hyfforddiant yn y Cylch Allanol i Geiswyr sydd am ymuno â'n cwfen a cherdded Llwybr yr Ynydai.

Mae ein hyfforddiant yn y Cylch Allanol ar gael yn rhad ac am ddim, fel yr hyfforddiant i gyd yn y Cylch Mewnol, i'r rhai sydd wir am ddysgu am Wica Draddodiadol Prydain, ymarferion gwrachyddiaeth, a gwybodaeth ehangach ym myd yr ocwlt, gyda strwythur cefnogol a lled-ffurfiol.

Cyn dechrau ar y Rhaglen, mae darpar-fyfyrwyr yn cael cyfweliad cyfeillgar, sy'n eich helpu chi a'n helpu ni i weld a ydych chi'n ffit da i'n cwfen, ac a ydyn ni'n ffit da ichi. Os cewch eich derbyn, mae disgwyl i chi wneud eich gorau glas i orffen y rhaglen, ond mae croeso i chi stopio ar unrhyw adeg. Os nad yw'r cynnwys, y proses, na'r cysylltiad ddim yn dwyn ffrwyth i chi nac i ni, byddwn yn argymell i chi ddewis llwybr gwahanol. Rydyn ni'n gwerthfawrogi gonestrwydd - mae cerdded i ffwrdd â gonestrwydd bob tro yn well na cherdded ymlaen heb argyhoeddiad.

Mae hyfforddiant y Cylch Allanol yn cynnwys 13 gwers wyneb yn wyneb, gyda phob gwers yn archwilio topig neu arfer pwysig sy’n adeiladu ar eich sgiliau a’ch dealltwriaeth fel Profiannwr. Mae’r gwersi hyn yn cynnwys ymarferion a dysgeidiaethau sy’n hanfodol i Waith yr Ynydai – sgiliau sy’n creu sylfaen i’r hyn a ddaw. Ar ôl pob sesiwn wyneb yn wyneb, bydd gwaith theori dilynol er mwyn dyfnhau eich dealltwriaeth a myfyrio ar yr hyn a ddysgwyd. Mae’r elfennau theori ac ymarferol ill ddau yn ofynnol er mwyn cwblhau’r cwrs yn llwyddiannus.

Er ein bod yn rhoi croeso i’r rhai sydd am ddilyn y Llwybr hwn, rhaid nodi nad yw cwblhau cwrs y Cylch Allanol yn sicrhau y byddwch yn cael eich Ynydu. Mae Ynydu yn ymrwymiad difrifol, a rhaid i’r ddau ohonon ni deimlo bod y perthynas yn fuddiol. Mae drysau’r Cylch Mewnol yn agor pan fo cyd-ymddiriedaeth, cyd-gysylltiad, a chyd-aliniad. Os cewch eich derbyn am Ynydu, dyna fydd gwir ddechrau ar Waith y Cylch.

Rydyn ni’n rhoi croeso i ymholiadau oddi wrth Geiswyr sydd o ddifrif, waeth beth fo eu rhyw, rhywedd, rhywioldeb, hil, gallu corfforol, neu gefndir addysg. Y cyfan ein bod yn gofyn amdano yw bod eich Ceisio yn dod o’ch calon, a’ch bod yn barod i ymrwymo i ddysgu, i fyfyrio, ac i dyfu.

Nid ydyn ni’n ymddiheuro am y ffaith bod angen ymrwymiad mawr er mwyn dilyn cwrs ein Cylch Allanol. Mae safon y gwaith yn uchel, a bydd y cwrs yn gofyn llawer oddi wrthych chi – fel ei fod yn gofyn llawer oddi wrthyn ni hefyd. Byddwch yn onest gyda’ch hun a gofynnwch y cwestiynau yma i chi’ch hun: “Oes gen i’r amser, lle, ac egni i wneud yr hyfforddiant hwn yn flaenoriaeth yn fy mywyd?” Os mai “nac oes” yw’r ateb, neu hyd yn oed “dim eto,” mae hynny’n iawn. Efallai nid dyma’r amser cywir i chi. Cymerwch yr amser i feddwl ac i baratoi – byddwch chi’n gwybod yn iawn pan fo’n iawn i gymryd y cam cyntaf.

Os rydych chi’n byw yn ardal de-ddwyrain Cymru, neu ar ei phwys, a hoffech ragor o wybodaeth, mae croeso i chi gysylltu â ni drwy’r cyfeiriad e-bost sydd ar gael ar waelod y dudalen hon drwy glicio ar y symbol e-bostio. Byddwn ni’n hapus i ateb eich cwestiynau a’ch helpu i benderfynu a yw’r llwybr yma yn un iawn ar eich cyfer.

Gyda bendithion cynnes,

- Cwfen yr Axis Mundi